مملــكة الاعلامــي نيشــان

عزيزي الزائر / عزيزتي الزائرة
يرجي التكرم بتسجبل الدخول اذا كنت عضو معنا او التسجيل ان لم تكن عضوا وترغب في الانضمام الى فان كلوب الاعلامي نيشان
سنتشرف بتسجيلك

شكرا

ادارةالمنتدي


فان كلوب ملك الاعلام نيشان ديرهاروتيونيان
 
الرئيسيةبحـثالتسجيلدخول

شاطر | 
 

 مغامرااااااااات جنات

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الااااااااااااااانااااااا
عضو جديد
عضو جديد


رسالة sms النص
انثى
عدد الرسائل : 5
نقاط : 5
السٌّمعَة : 0
تاريخ التسجيل : 29/09/2010

مُساهمةموضوع: مغامرااااااااات جنات    الخميس سبتمبر 30, 2010 1:54 am

1-الخيانه
صحت جنات مفزوعه من نومها بعد أن رأت كابوسا في نومها
جنات تصرخ بعلو الصوت :- ألحقوني .
يجري والدها ووالدتها اليها قائلين لها :- شو يابنتي
جنات تصرخ :- شفت حلم كابوس بابا شفت مجدي عم يخونني .
ينظر أليها والديها بغضب قائلين :- خوفتينا بس هيدا اللي شفتيه ؟
في الصباح تخرج جنات وتلتقي بمجدي في المطعم
مجدي :- شو ياقلبي شو قالب خلقتك علي اليوم ؟
جنات :- مابتعرف اناشفتك في المنام عم تخونني و الا منك متزكر .
مجدي :- بالله شو انا كنت عم اخونك في المنام غلطانه كتير انا ما بخون أصلا انا الوفاء خلق مني روحي كلمي منامك يحل عني
جنات :- أنا مناماتي ماتنزل الأرض أبدا وأنا متأكدة انك عم تخونني
يتحدث مجدي مع نفسه قائلا :- شو هالمصيبه هاي من هلق بلشت تغار لكن بعد الزواج شو راح تعمل
مجدي يبتسم قائلا :- ياقلبي ياعمري ماتسدقي أحلامك أكيد الشيطان عم يوسوس ليكي
بعد ذلك يتحدث مع نفسه قائلا :- تضربي أنا بخونك بس بسر لازم أعيش حياتي بطول والعرض مفكره راح أتخلى عن مغامراتي من شانك لازم أعيش حياتي قبل ما أدبس وارتبط فيكي .
مجدي يكلم جنات قائلا :- ماتسدقي أحلامك ياعمري أنا عمري ماراح أخونك .
بعد ذلك تأتي فتاتان قد ربطتهما علاقه قديمه بمجدي وتتحدثان إلى مجدي
الفتاتان :- هاي مجدي كيفك ياقلبي وحشتنا ليال الغرام وينك ماعم نشوفك
تنظر جنات باحتقار الى مجدي قائله :- شفت أنا أحلامي حقيقية وما بتكزب ومن هلق انته في سكه وأنا في سكه تانيه لابقى تجيني ولاانا اجيلك
بعد ذلك يحاول مجدي ان يعيد علاقته بجنات والتي قد قطعت علاقتها به ولكنها لم تقبل أن ترد عليه
احضر مجدي مجموعه من الناس حتى يشهدوا بنزاهته واستقامته لها
وفي منزلها
جنات تقول بغضب لمجدي :- مين هدول وليه جايبهم لهون ؟
مجدي :- هدول حياتي أصدقائي المقربين جايين عم يشهدوا لي بحسن الاستقامة وان احلامك اللي عم تشوفيها غلطانة أعرفك عليهم هيدا رفيقي كريم كان وزير صحة وبعدين صار وزير دفاع وهلق هو أمين مكتبه وهيدا رفيقي تامر بيشتغل مدرس في مستشفى الحكمه وهيداسليم رفيق أيام الطفولة كتير بحبه بتربطني فيه صداقة مصلحة وبس
جنات تقول بغضب :- ايه وبعدين ؟
مجدي يوجه كلامه الى اصدقائه قائلا :- حبايبي الحلوين انتوا شفتوني مره عم أخون حدا منكن
يقول الأصدقاء بصوت واحد :- ابدا مطلقا نهائيا
مجدي :- شفتي ياقلبي اني بعزك وأحلامك هاي ارميها وراء ظهرك .
جنات :- مش راح اسدقك أنت واحد غشاش مفكر راح اسدقك عن أزنك .
بعد ذلك يحاول مجدي آن يقنع جنات انه لا يخونها فأرتدي لباس امرأة وذهب إلى منزلها
جنات :- أنتي مين أنا باشبه عليكي ؟
مجدي يقول بصوت امرأة :- يخلق من الشبه أنا ومجدي اقصد انا جابيه أقنعك بخصوص حبيبك مجدي هو زعلان لأنك قطعتي علاقتك فيه أنا أخته ساميه
جنات :- اهلين ومرحبا فيكي بس أنا ما بدي تكلميني عنه أنا شفته عم يخونني
مجدي :- ايه هو قاللي انك شفتيه بأحلامك بس قال ماتسدقي أحلامك لأن أحلامك إنسانه شريره بدها تفرق بينكن ياقلبي
جنات تقول باستغراب :- نعم
مجدي :- شوفي راح أبرهن ليكي انه ماعم يخونك إن شاء الله تعدمي نظرك أو يصير لك حول ازا هو خانك .
جنات :- نعم
مجدي :- شفتي ماصار لك شي يعني هو ماعم يخونك ماتمشي وراء اوهامك
جنات :- مش راح اقتنع وبليز مابدي تقنعيني أنا بعرف كل شي
مجدي :- لازم تبعدي هيدا البلبال من راسك
جنات :- شو هيدا البلبال
مجدي :- الوسواس ياعمري
جنات :- بلبل في رأسك أنتي مابدي كتر حكي عن أزنك
بعد ذلك يأس مجدي من أقناع جنات من الرجوع اليه فيتركها
جنات تتحدث الى صديقتها قائله :- شفتي هاي المجدي عم يقهرني طيب اناكمان راح اقهره
صديقة جنات :- شو راح تعملي
جنات :- راح أخونه متل ماهو عم يخوني و الا انه مفكر حاله رجال انا كمان بعرف أخون
بعد ذلك تخرج جنات مع احد الشباب الذين تعرفت اليهم وتجلس معه وبالمقابل تلاحظ وجود مجدي مع إحدى الفتيات
تنظر اليه جنات بحنق وتقول في سرها :- ياالله شو غليظ مفكر أن مافي حدا قده.
بالمقابل يقول مجدي في سره :- اديش غليظة مفكره راح ازعل لما بشوفها مع واحد شحط أهبل مثل هيدا
جنات تقول بسرها :- منهوه هاي اللي جابها معه أكيد واحده شرشوحه متله
مجدي يكلم نفسه :- يارب انت عارف إني مظلوم وأنها ظلمتني صحيح يارب أني خاين بس هي ظلمتني يارب خليها تطق وتنقهر متل ما قهرتني
جنات تحدث نفسها :- ان شاء الله أن الصبية اللي معاه تقوم وتتركه لحاله
مجدي يحدث نفسه :- قرف يقرفك إن شاء الله يكتشف انك عامله 99 عمليه تجميل وان انفك عامل متل الكوسة المحشيه
جنات تحدث نفسها :- إن شاء الله تكتشف انك عم تدهن شعراتك بزيت جاز
تتحدث صديقة مجدي قائله له :- شو مجدي انا شامه ريحة قاز ما بعرف من وين المصدر

صديق جنات :- أنا حاسس إن انفك مش طبيعي ممكن تخبريني شو اللي عبيتيه ؟
جنات ترد عليه :- عبيته رز ههها
بعد ذلك تحدث جنات نفسها قائله :- إن شاء الله تكتشف انك نذل وخاين
صيقة مجدي تقول لمجدي :- عم أشم ريحة نذاله ممكن تخبرني وين المصدر
مجدي :- احترمي نفسك من ساعة و أنا مستحمل غلاظتك
تقوم صديقة مجدي وتأخذ حقيبتها وتذهب وهي غاضبة
مجدي ينظر الى جنات وهو يداري وجهه
بعد ذلك صديق جنات يقول لها :- ممكن اعرف شو عبيتي تمك انفك حشيتيه رز وتمك شو حشيتيه ليكون لحمه
تنظر جنات بغضب إلى صديقها الجديد قائلة :- احترم نفسك من ساعة و أنا مستحمله غلاظتك .
بعد ذلك يجلس مجدي وهو وحيد وتجلس جنات لوحدها ينظر الاثنان إلى بعضهما البعض
2-عيد الحب مقتبسة من احدى حلقات تيمون وبمبه
جنات تكلم مجدي قائلة :- حبيبي مجدي آنت عارف شو ها اليوم ؟
مجدي :- ايه اليوم الخميس
جنات :- أنا عارفه انه الخميس بس منك متذكر شي ؟
مجدي :- لا ياحبي أنتي بتعرفي أنا زاكرتي الأسلاك فيها متشابكين
جنات :- صح بس أنت مره قلت لي إن السلك اللي في مخك مقطوع وهلق عم تقول إنهن متشابكين
مجدي :- حبيبتي أنا بحبك كتير فهيدا يعني ان الأسلاك متشابكة ولما اتخانق معك بيصير السلك في مخي مقطوع
جنات :- مابعرف بس أنت نسيت اليوم شي مهم ؟
مجدي :- عمري ياقلبي ياروحي ياحبي شو اللي نسيته ؟
جنات :- ان اليوم هو عيد الحب
مجدي :- ليه هما الأحباب عملوا لهن عيد
جنات :- هيك بتزعلني منك انته عم تتهرب من شان ما تجيب هديه لإلي
مجدي :- ياويلي وكمان فيها هديه
جنات :- ليه مابدك تجيب لي هديه أنا اشتريت لك هديه كنير حلوه
مجدي يقول مرتبكا :- ياجنات ياعمري ماتزعلي أنا كمان اشتريت لك هديه بس كنت عم امزح معك
جنات تقول بسعادة :-عن جد شو هي ؟
مجدي يقول مرتبكا:- شو هي اشتريت لك شاي اخضر عشان تخسي
جنات تقول بغضب :- شو شاي اخضر بس أنا مش ناصحة بتذكر انك جبت لي شاي اخضر قبل سنتين
مجدي :- اه صح اه افتكرت اشتريت لك روج لونه حلو كتير
تبتسم جنات قائلة :- عن جد وشو هي ماركته ؟
مجدي يجيب مرتبكا:- شو ماركته اعتقد ليبتون روج ليبتون
جنات تقول غاضبه :- انته كزاب مافي ماركة روج اسممها ليبتون هاي ماركة شاي أنا زعلانه منك كتير
مجدي :- ياحبيبتي أنا أسف كتير نسيت عن جد شو اشتريت لك راح اتزكر وأنتي شو اشتريتي لي
جنات تقول بفرح :- اشتريت لك لاب توب شو رأيك بهاي الهديه
مجدي :- الله هاي هديه تسلمي حبيبتي كلك زوق
جنات :- لكن انته ماقلت لي شو اشتريت لي
مجدي :- اه اشتريت لك ماسكارا عشان رموشك يصيروا طوال أنتي عم تشوفي البنات اديش رموشهن طوال و انا عايز رموشك يصيروا طوال متلهن عارفه انه ماعندك رموش
جنات :- نعم بس أنت اشتريت لي الماسكارا السنه اللي راحت وإلا نسيت ؟
مجدي :-اه صحيح تزكرت
جنات :- اعترف مجدي انك ما اشتريت لي هديه الصراحة راحة يا حبيبي
مجدي :- صح ياقلبي فين اللابتوب اللي اشتر يتيه ؟
جنات :- معي خده
تعطي جنات الهديه لمجدي
جنات :- مجدي بس أنتا ما اشتريت لي شاي اخضر ولا ماسكرا ولا عمرك جبت لي هديه
مجدي :- اه صح ياقلبي بعتزر منك بتعرفي عندي مشاغل كتيره وأمور اكتر الهدايا مابتعنيني أهم شي حبيبتي إني بجيب لك حبي وقلبي هديه
جنات :- مجدي انته مابتحبني مجدي مستخسر حتى هديه بسيطه فيني أنا زعلانه منك كتير
مجدي :- ما تزعلي يا قلبي أنا بعتزر منك للمره التانيه فوتيها
جنات :- لامش راح أفوتها أنا زعلانه كتير عن أزنك رايحة يا مبخله
مجدي :- جنات بليز لاتزعلي و انا رايح اشتري لك هديه بكره
جنات :- بعد شو بعد الفأس ما وقعت بالرأس مابقى تتصل فيني أنا رايحه
مجدي يتحدث مع نفسه قائلا :- شو بها هاي شو عملت لها؟
بعد يومين يخرج مجدي مع صديقه جديده وأثناء خروجهما تقول له صديقته الجديده وهي تتوقف أمام إحدى المحلات
مجدي لو سمحت شوف البلوزه هاي اديش حلوه ممكن تشتريهالي ؟
مجدي :- بس يانسرين هاي بلوزه غاليه كتير وبعدين مش حلوه ما بتناسب لو ن بشرتك شو في لونها
نسرين :- اكيد فيه الوان راح اشتري لون يناسب بشرتي شو رأيك اشتري لون اورانج
مجدي يقول مستاءا :- وتصيري الانسه اورانج لايانسرين مش منيح يقولوا عنك الانسه اورانج
نسرين :- خلاص راح اشتري لون احمر شو رايك ؟
مجدي :- لالالا هاي اللون أنا بكرهه بيزكرني بلون الدم
نسرين :- خلاص اشتري لي لون اسود
مجدي :- لالالا هاي لو ن كئيب بيفكرني بالموت والعزاء لازم ياقلبي تفكري بلون حلو هيك مفرح
نسرين :- خلاص اشتري لي لون اصفر
مجدي يقول غاضبا :- أعوز بالله هاي لون يدل على المرض وأنتي وشك اصفر ومش ناقصة يانسوره
نسرين تقول غاضبه :- مابقى بدي منك شي روح الحمدلله إنني اكتشفت انك بخيل أحسن ما أضيع وقتي معك
يعد ذلك يرجع مجدي لجنات ويذهب إلى شقتها قائلا لها :- جنات أنا كتير عم اتعزر منك على هديك اليوم سامحيني وواعدك مش راح أنسى أبدا
جنات تقول بفرح :- أكيد
مجدي :- أكيد أنا بحبك أكيد وراح أقدم لك قلبي هديه
جنات :- طيب قبلانه ممكن تقوللي شو اشتريت لي هديه
مجدي:- اكيد اشتريت لك هديه هاي لاب توب محمول أحسن هديه شو رأيك ؟
جنات تقو ل بفرح :- يا سلام أحسن هديه بس هاي المحمول أنا شفته من قبل
مجدي :- يمكن يخلق من الشبه أربعين يا حياتي شو رأيك بهاي الهديه ؟
جنات :- حلوه كتير تسلم يا عمري أنا بحبك من كل قلبي وبيكفي انك افتكرتني


3- سياسة العكس
كانت جنات تتحدث إلى مجدي في أحدى المطاعم
جنات :- شو هيدا يامجدي امتى راح تبطل حركات الخبص تبعك ؟
مجدي :- انا عم اخبص شو ياقلبي ليه عم تقوللي هيك ؟
جنات :-مفكر اني ماني عارفه انك داير على حل شعرك مع البنات وانك عم تخونني
مجدي :- عيب عليكي هاي الحكي وبعدين انتي ماالك علاقة
جنات:- خلص ازاماتركت حركاتك هاي راح ازهق واتركك
مجدي :- لا ياعمري ماتتركيني وبعدين انا بحبك كتير ما بدي نترك بعض أنتي ما بتعرفي اديش أنا بحبك
جنات :- اه ياقلبي راح يطق طيب شو رأيك نخطب اديش صار لنا بنعرف بعض
مجدي :- ياروحي مافيني اخطب هلق بعد بكير لازم نعرف بعض اكتر ياعمري .
جنات :- نعم لابدك نخطب ولا بدك نترك ولا بدك تحل عن البنات اللي أنت عم تعرفهن .
مجدي :- جنات ياعمري ليه ما بدك تفهميني أنا راح أخطبك بس مش هلق أنا مشغول كتير ومتصربع ومش فاضي .
جنات :- مشغول بشو ؟
مجدي :- بكتير أشياء
جنات تقف غاضبة قائلة :- لما تكون فاضي أبقى كلمني .
بعد ذلك تذهب جنات إلى أحدى الأطباء النفسيين المشهورين كانت جنات تتلكم مع الطبيب والذي كان بيده عصا
كان الطبيب يدق على الطاولة أمامه بالعصا
الطبيب :-اسمعي يا انسه جنان
جنات:- جنات يا دكتور
الطبيب :- حبيبك هيدا لازمه علاج من نوع خاص
جنات :- كيف ما فهمت عليك يا دكتور ؟
الطبيب :- حبيبك مجدي عنده حاله اسمها الارتداد الانعكاسي
جنات :- شو يعني الارتداد الانعكاسي
الطبيب يدق الطاوله بالعصا قائلا :- ما حدا يعرف الارتداد الانعكاسي هيدا مرض يعني إن حبيبك عنده أعصاب في مخه عنيده كتير بترفض أي استجابة لأي مؤثرات خارجيه
جنات :- كيف يا دكتور ممكن تشرح لي اكتر
الطبيب :-أنتي سمعتي عن سياسة العكس
جنات :- لا يادكتور أول مره بسمعها منك
الطبيب :- حبيبك ما بده حدا يمشي رأيه عليه بده هو يمشي رأيه أنتي بتشوفي اكتر الخلافات السياسية بتكون من تحت رأس سياسة العكس هاي يعني المدخلات أو المعلومات اللي بتدخل أعصاب المخ بترفض تتقبلها
جنات تقول بحزن :- يعني مجدي مريض بسياسة العكس
الطبيب :- يا انسه هو اسمه مرض الارتجاع الانعكاسي
جنات :- انته قلت الارتداد الانعكاسي
الطبيب :- كله نفس المعنى
جنات :- فيه اله علاج يا دكتور أنا خايفة عليه كتير

الطبيب :- ما تخافي 99من الناس عندهن هيدا المرض لكن أنا و أنتي يا انسه من الواحد المتبقي اللي ما عندهن هيدا المرض إيه أكيد فيه له علاج راح أقلك شو هو أنتي لو بدك شي منه تعكسي الطلب
جنات :- شو يعني
الطبيب:- ازا مثلا بدك منه شي تعكسي تقوللي مثلا ازا بدك تروحي معه لشي محل أنا مابدي أروح وهو راح يعكس ويقلك لا أنا بدي أروح هلق
جنات :- وهاي الطريقة بتنفع دكتور
الطبيب :- ايه كتير جربيها وراج تيجي لعندي وتجيبي لي هديه
تبتسم جنات :- اكيد دكتور وأحلى هديه شو بدك أجيب لك
الطبيب :- بدي تاخديني على مدينه الملاهي لماكنت زغير كانت الماما مشغوله كتير وماكانت تاخدني لهونيك
كانت جنات جالسه مع مجدي في إحدى المطاعم
جنات :- قلت لك يامجدي مابدي اجي على ها المطعم وأنت اصريت
مجدي :- شو فيهاشو في اديش المطعم حلو
جنات :- حبيبي لازم تدخر شوي هيك انتا عم تبعزق فلوسك يمين وشمال
مجدي :- من شان عيونك يا روحي
جنات :- مجدي يا روحي أنا فكرت كتير وقررت انك كنت صح برأيك لازم تعيش حياتك ياعمري بالطول والعرض وماتسيب واحده حلوه تفلت منك وأنت بقبرني بتحن بيوقع قلبك منك
مجدي يقول مستغربا :- شو هيدا الكلام يا عمري أنتي ما كان رأيك هيك
جنات :- انا فكرت كتير شو زنبك تحبس روحك من شأني يمكن أنا ما بستاهل لازم تنطلق بكل الاتجاهات وتعيش حر تعمل ما بدالك متل الحيوان
مجدي يقول غاضبا :-متل شو؟
جنات :- سوري ياحبيبي اقصد متل الطير تعيش حر متل الطير تعمل ما بدالك شوفت الطيور ما أحلاهن عم يطيروا في الجو مافي قفص عم يحبسهن حتى أنا كمان قررت أعرفك على رفقاتي الحلوين من شان تختار هيك شي صبيه حلوه تعيش معها أحلى ليالي
ينظر مجدي الى جنات مستغربا ثم يقول لنفسه :- شو اللي غير ها هاي ماكانت هيك انتي لشو عم تخططي ياجنات أكيد بدك تدمري سمعتي وأكيد انك عم تخططي لشي مصيبة تاخدك وبعدين خلاص أنا قررت من هلق ما اعمل علاقه مع أي صبيه
جنات تنظر إلى مجدي والذي كان ينظر اليها مستغرباوتقول :- حبيبي أنا كمان ما بدي ارتبط هلق بدي أعيش حره متلك اعمل مابدالي قال زواج قال اديش كنت مغفلة هبلاء لما طلبت أيدك اقصد لما قلت لك نخطب عيش حياتك حبيبي واعمل ما بدالك وانا راح انطرك لأخر يوم بعمري
في اليوم التالي جاء مجدي مع والده ووالدته يخطبون جنات لمجدي وبعد ذلك ذهبت جنات وأخذت الطبيب إلى مدينة الملاهي حتى يلعب




4-عين الحب
في شقة مجدي كان مجدي وجنات يتحدثان وهما يشاهدان التلفاز
جنات :- إيه مجدي من ساعه وأنتا حاطط مسلسلات الأخبار هاي غير حط لنا شي فيلم نتفرج عليه
مجدي :- اوكيه حبيبي لكن تاعي جنبي هون
جنات :- ليه بدك تعمل متل المره الماضية لما طرشتني بوسه
مجدي :- بوسه بريئه
جنات :- مافي بوسات الا بعد الزواج يا عمري
مجدي :- راح امسك أيدك بس
جنات :- اوكيه تاعى امسك أيدي
مجدي يمسك ايد جنات وهو يقول :- يا سلام اديش أيدك حلوه وناعمه
تبتسم جنات بخجل قائلة :- ميرسي
ينظرمجدي الى وجهها قائلا :- حبيبتي اديش أنتي حلوه اليوم شو عملتي
جنات :- ولاشي
مجدي :- بشرتك حلوه ونضره
جنات :- ميرسي
تنظر جنات الى ساعتها قائله :- مجدي أنا اتأخرت لازم أروح هلق باي ياقلبي
تصل جنات الى غرفتها وتنظر الى نفسها بإعجاب قائلة :- ايه مجدي عنده حق اديش أنا حلوه اليوم بشرتي كتير حلوه ونضره
في الصباح تستيقظ جنات وتنظر إلى نفسها في المرآة وتلاحظ ظهور حبه صغيره في انفها فتصرخ
يأتي اليها والدها ووالدتها قائلين :-خير شو فيه ؟
جنات :- فيه حبه طلعت في وشي
الوالد :- جنات امتى راح تبطلي حركاتك هاي بتصرخي عشان حبه طلعت في وشك
جنات :- ايه بابا شوف الحبه كيف بدي هلق اظهر
الوالد :- يالطيف عندك حق لاتظهري اقعدي في البيت
بعد ذلك بساعات تأتي صديقة جنات وتدعى امنيه وتقعد الاثنتان مع بعضهما
جنات :- شوفتي ياامنيه الحبه اللي طلعت في وشي صايره عم تكبر اليوم ما ظهرت بسببها
أمنيه تنظر باهتمام الى وجه جنات :- ايه جنات والحبه هاي عم تكبر شكلها بشع كتير
جنات :- وهلق شو بدي اعمل ؟
امنيه :- ايه ياجنات انا مابعرف حطي لها كريم
جنات تقول وهي تبكي :- حطيت مازبط الحال
امنيه :- طيب حطي لها ليمون
جنات :- كمان حطيت مازبط الحال
امنيه تبكي قائله :- ياخساره كنت دايما أحسدك على بشرتك اللي كانت حلوه أكيد فيه واحد نطحك عين متل التور عندما ينطح حدا
جنات تقول باهتمام :- عم تحكي جد اه عين وانا عم اقول لحالي ليه كافة الادويه مازبطت معي بس مين مصلحته انه ينطحني عين
امنيه :- فيه حدا بيكرهك
جنات :- لا يا امنيه أنا ما بكره حدا ولا حدا بيكرهني
اامنيه :- شوفي لو كانت عين لازم تعرفيي مين اللي نطحك عشان نقدر نحل المشكله
جنات :- مابعرف
امنيه :- فيه حدا اتغزل فيكي وببشرتك أمبارح
جنات :- مافيش غير مجدي خطيبي
امنيه :- اه عرفت هو اللي صرعك بالعين
جنات :- وهاي العين في لها دواء
امنيه :- ايه انا مره قريت في كتاب انه ازا حدا صرعك عين تروح وتقول له وتخليه يقص من شعراته وتحرقهن وتقعد تتبخرفيه
جنات :- عن جد والعين هاي راح تروح
أمنيه :- أكيد
جنات :- بس كيف بدي اخبره لمجدي راح يزعل وياخد على خاطره
امنيه :- مش راح يزعل هاي شي مابيزعل العين حق وهو أكيد بيعرف هاي الشي
جنات :- اوكيه
في شقة مجدي كان مجدي وجنات يتحدثان
مجدي :- ايه جنونه كيفك شو اخبارك
جنات :- زفت اطلع بوشي منيح
مجدي ينظر الى وجهها قائلا :- مافيش حدا اسمه زفت
جنات :- لاتجنني شوف وشي اطلع لأنفي منيح
مجدي :-انفك شوبه بده عمليه تزبيط رابعه
جنات :-لاتجنني شوف الحبه اللي فوق انفي
مجدي :- اه فيه حبه كتير بشعه شو جاب هاي لهون
جنات :- أنت
مجدي :-كيف انا جبتهابس مابتزكر اني اشتريت لك حبه
جنات :- ايه انت حضرتك يااستاز نطحتني عين هديك اليوم لماقعدت تتغزل ببشرتي
مجدي :- اناكنت عم ارفع من معنوياتك وهلق تقوللي لي انني نطحتك عين ياعيب الشوم
جنات :- هلق لازم تشيل هاي الحبه
مجدي :- كيف بدك اشيلها اعمل لك عمليه
جنات :- لا بدك تروح وتجيب مقص وتقص من شعراتك عشان احطه فوق النار واتبخر فيه
مجدي :- انتي عن جد عم تحكي
جنات :- وجد الجد كمان
مجدي :- وفين راح حبنا والأيام الخوالي ازا أنتي عم تشكي انني نطحتك عين
جنات :- راحوا مافيش في العين ياامه ارحميني بدك هلق تروح تجيب مقص وتقص من شعراتك وتجيبهن لعندي
مجدي :- حاضر ياروحي ماتزعلي حالك ابدامافي شي يستاهل تزعلى حالك من شانه
مجدي يتحدث الى نفسه وهو يذهب الى المطبخ قائلا :- يالطيف اديش سخيفة وسطحيه
يحضر مجدي المقص ويقول لجنات :- وهلق حياتي لازم تغمضي عيونك عشان أنا مابدي تشوفيني عم أقص من شعراتي
جنات :- ليش
مجدي :- بأستحي ياعمري
جنات :- اوكيه
جنات تغمض عينيها
يضحك مجدي ضحكة شريره وهو يقص من شعر جنات
مجدي :- وهلق حياتي فتحي عيونك
تفتح جنات عينيها :- خلاص قصيت من شعراتك
مجدي :- ايه ياقلبي وهلق خدي هدول الشعرات
تاخذ جنات الشعر قائلة :- اوه ميرسي كتير مجود لكن ليه الشعرات صار لونهن اصفر
مجدي :- ياقلبي الشعرات لماينقصوا بيصير لونهن اصفر يمكن من الخوف هلق روحي حطيهن على النار وتبخري فيهن
تذهب جنات وتضع الشعر فوق البوتجاز وتتبخربهن
بعد ذلك تعود جنات الى منزلها وتنظر الى المرآه فتلاحظ اختفاء الحبه وتلاحظ ان شعرها اصبح قصيرا قليلا
جنات :- غريبه كيف قصروا شعراتي مش مهم المهم ان الحبه راحت
في اليوم التالي يتحدث مجدي مع جنات في إحدى المطاعم
مجدي :- مبروك ياروحي إن الحبة راحت من وشك
ثم يتحدث الى نفسه قائلا :-حسدت حالها مايحسد المال الا اصحابه .
5-الغيره الحمقاء
تلاحق جنات مجدي أثناء ذهابه إلى إحدى المطاعم برفقة إحدى الصبايا تدخل ورائهما وتذهب إلى مدير المطعم
جنات :- هاي استاز ممكن تسمح لي اليوم أصور الكاميرا الخفيه مع احد الأشخاص القاعدين في المطعم
مدير المطعم :- تكرمي ياانسه حضرتك مزيعه
جنات :- ايه
مدير المطعم :- في قناة ؟
جنات :- قناة شو رأيك
مدير المطعم :- شو رأيي بشو ؟
جنات :-القناة اسمها شو رأيك
مدير المطعم :- اه بس ماسمعت قناة اسمها شو رأيك
جنات :- هاي قناة مشفره
مدير المطعم :- اه طيب وين طاقم التصوير
جنات :- قاعدين بره
مدير المطعم :- اوكيه ياانسه راح اكلم المشرف يساعدك
ترتدي جنات قناعا وتذهب إلى الطاوله التي كان يجلس عليها مجدي ورفيقته
جنات :- هاي بدكن تطلبوا شي ؟
مجدي :- هايين
رفيقة مجدي :- ممكن تخبريني ليه حاطه قناع على وشك
جنات :- اصلا خطيبي قاعد هووووووووون ومابدي يتعرف علي
مجدي :- حلو خايفه منه يعني ممكن نعرف ليه
جنات :- هيك مابدي يتعرف علي راح يتركني ازا عرف أني عم اشتغل هون
رفيقة مجدي :- اوكيه شو اسمك
جنات :- جنى
رفيقة جنات :- حلو اسمك جنى
جنات :- وهلق شو بدكن تطلبوا
مجدي :- فيه عندكن شيش طاووق
جنات :- ايه بدك شيش طاووس اقصد شيش طاووق بأنفلونزا الخنازير اقصد بأنفلونزا الطيور بس ماتخاف احنا اعطيناهن مضاد حيوي وصاروا مناح قبل ماناكلهن قبل ماندبحهن
رفيقة مجدي :- بلاها الشيش طاووق اطلب شي تاني
مجدي :- طيب فيه عندكن لحمة لا تقولي إن اللحم مستورد من المكان اللي فيه هيدا اللي اسمه جنون البقر
جنات :- للأسف كلامك مزبوط بس مرض تأني البقره كانت بتعاني من انفصام بالشخصية كانت مفكره حالها ديك أنا بعد ماكلت من لحمها أسبوع كامل وأنا مفكره حالي قطه
صديقة مجدي :- بلاها فيه عندكن رز
جنات :- ايه بس رز مطيوخ بزيت الحيه والا زيت الضفدع بدكن
مجدي :- ليه
جنات :- عشان شفتوا الصين اديش ناس عملييين قلنا نقلدهن بأكلاتهن من شان نصير متلهن
صديقة مجدي :- بلا الرز جيبي لنا مكرونه وعصيربرتقال بس بيكفي
جنات :- تكرم عيونكن عن ازنكن .
بعد ذلك تذهب جنات وتضع صمغ قوي على إحدى المقاعد قائلة في نفسها :- طيب راح اورجيك يامجدي بعد ان تنتهي من وضع الصمغ تذهب إلى مجدي ورفيقته
قائلة لهما:-ممكن تغيروا لطاوله اللي هناك طلبكن محطوط هنيك
مجدي :- ليه ؟
جنات :- من شان هاي الطاوله محجوزه للناس المهمين والمحترمين بس اقصد هاي الطاوله محجوزه فيه ناس مهمين راح يجوا
صديقة جنات :- اوكيه يلا مجدي نغير الطاوله
يذهب مجدي ورفيقته الى الطاوله المقصوده
جنات :- لازم استاز تقعد هون وخلي الانسه تقعد على الكرسي التاني
رفيقة جنات :- ليه
جنات :- هيك من شان انتي صبيه حلوه ومابدي اياكي تشرشحي اقصد بدي اياكي تكوني مرتاحه
يجلس الاثنان على المقعدان
جنات :- ان شاء الله الغداء يعجبكن
بعد الانتهاء من الاكل يحاول مجدي الوقوف و لايستطيع
رفيقة مجدي :- شو بك مجدي ؟
مجدي :-مابعرف مش قادر أوقف حاسس فيه شي عم يلصق ببنطلوني
رفيقة مجدي :- عن جد عم تحكي
تنادي رفيقة مجدي على جنات قائلة لها :- انسه جنى مابعرف ليه مجدي ماقدر يوقف من الكرسي
جنات :- اوه نسيت اسفه استاز مجدي اليوم كان فيه الكاميرا الخفيه وما بعرف يمكن حد حط صمغ على كرسيك
مجدي :- وينها الكاميرا الخفيه ما بشوفها
تشير جنات الى الخارج :- هنيك خلق الشباك
رفيقة مجدي :-كيف مابشوف كاميرا
تخلع جنات القناع وهي تقول لمجدي :- ايه استاز مجدي مفكر انني مابعرف خطواتك
مجدي :- جنات انتي فاهمه غلط هاي مدام كارول وإنا عزمتها على عشاء عمل
جنات :- بالله شو عشاء عمل كيف الوقت لساتو وقت غداء يا غشاش يامخادع
رفيقة مجدي :- ايه انسة جنات هيدا كانت عزومة غداء انا متزوجه وعندي ولدين مايروح فكرك بعيد
مجدي ينظر الى جنات قائلا :- جنات أنتي طالق
6-الحزن الدفين
في شقة جنات كانت جنات تتحدث مع صديقتها امنيه في غرفتهاوهي تستمع إلى اغنية ظلموه لعبد الحليم حافظ وكانت تبكي
امنيه :- بيكفي جنات شو فتي اديش استعملتي محارم جسمك راح ينشف من البكي
جنات :- اه ياامنيه أنا كتير مدايقة مجدي رافض يحاكيني صار له أسبوع حتى رافض يرد على التليفون او المسجات
امنيه :- عنده حق شو هاي العمله اللي عملتيها له في المطعم أنتي شرشحتيه
جنات :- ما انتي اللي قلتي لي اعمل هيك ؟
امنيه :- اه صح أنا اللي قلت لك خلص بيكفي قطعتي لي قلبي شويه بيروق وبيرجع لك
جنات :- بدي يحاكيني شو بدي اعمل ؟
امنيه :- عبري له عن حبك وعن حزنك أرسلي له بوكيه ورد
جنات :- عملت هيك مارد
امنيه :- خلص فكري بشي طريقة هيك تخليه يحن عليكي ويشفق قلبه عليكي ويعطف عليكي
جنات :- شو هاي الطريقة بتسمعي غنيه عبد الحليم عم تزيد حزني والمي شو رأيك امنيه
امنيه :- شو رأيي بشو ؟
جنات :- أروح اجمع له كل الأغاني الحزينه في سيدي عشان لما يسمعهن يرق قلبه علي
امنيه :- فكره كتير منيحه طيب شو هن الأغاني فكري بهيك أغاني تحقق الغرض المطلوب
جنات :- عندي هيك كم غنيه شورأيك بغنيه نسيانك صعب كتير لهاني شاكر؟
امنيه :- لالالا يا جنات راح تكرري غلطك لازم يحس انك إنسانه قويه لازم تحطي له شي غنيه هيك قويه شو رأيك بغنيه هوهو اقصد عوعو الواد قلبه بيوجعه
جنات :- هيك رأيك ؟
امنيه :- ايه وكمان شو بدك تحطي أغاني
جنات :- شو رأيك بغنيه مشيت خلاص لوائل جسار هاي الغنيه حزينه وراح تخلي قلبه يحن علي
امنيه :- هاي غلطة عمرك كنت مفكره انك أزكى من هيك لازم ماتحسيسيه انك ضعيفة وانك راح تموتي ازا مارجع لازم يحس انك إنسانه قويه واد الصدمات وان الكل بده رضاكي حطي له اغاني متل كلهن بدهن نانا وانا داناواي خدمة ياباشا هيك لازم يحس انه مايهمك حدا
جنات :- هيك قولك ؟
امنيه :- اكيد ياجنات
جنات :- طيب أحط له غنيه عيد ميلاد جرحي أنا ها ي الغنيه راح تخليه يبكي على حالي
امنيه :- جنات أنتي عبيطه هيك بيفكر انك كتير حزينه عليه وراح يتكبر عليكي اكتر ويشوف حاله اكتر لازم يشعر بقوة شخصيتك حطي له غنية سنرى سنرى سنرى مين راح ينهار نهار بعد نهار وطق موت موت يامغرور يا اناني
جنات :- عندك حق امنيه هدول أغاني لازم الرجال يشعر ان الست منها بحاجته طيب قومي نروح نسجلهن ونرسلهن اله
بعد أن ترسل جنات السيدي الى مجدي ويستمع اليهن مجدي يرسل مجدي لها هديه كتير حلوه وهي لافته كبيره مكتوب عليها أنتي طالق .

7-بشره حلوه
في شقة مجدي كان مجدي وجنات جالسان على إحدى المقاعد القريبة من التلفاز يشاهدان التلفاز
مجدي :- حبيبي جنات شو رأيك تجي جنبي لهون
جنات :- ايه قلت لك مافي بوسات الابعد الزواج
مجدي :- عرفنا هاي الشعار خلص تاعي جنبي راح امسك أيدك بس
جنات :- اوكيه
يمسك مجدي يد جنات قائلا :- حبيبتي ممكن تحلي السؤال الأتي
جنات :- شو السؤال ؟
مجدي :- اختر إحدى الإجابات التالية جنات 1- سطحية 2- تافهه 3- سخيفة 4- كل ماسبق
جنات :- سؤال سهل كل ماسبق ياروحي بد ي قلك شي
مجدي :- شو هو اللهم اجعله خيرا
جنات :- شفت يامجدي اديش بشرة الصينين حلوه ونضره تشوف الواحد عمره خمسين سنه وكأنه عمره عشرين
مجدي :- ايه ياروحي يمكن من الأكل اللي عم يأكلوه اكتر أكلاتهن بحريه لهيك هن ماعم يشيخوا بسرعه
جنات :- ايه يامجدي بس انا عملت بحث اكتشفت شي مهم
مجدي :- الله يسترمن اكتشافاتك
جنات :-انا دخلت النت وشفت ان الصينين عم يعملوا شي بيخليهن هيك شباب على طول
مجدي :- شو هو اللي عم يعملوه
جنات :- عم يجمعوا اكبر كميه من الصراصير ويحطوهن في الخلاط ويعملوهن كريم ويحطوهن على بشرتهن .
ينظر مجدي الى جنات باندهاش قائلا :- نعم بدك تحطي صراصير على وشك أنتي عم تحكي جد أكيد عم تمزحي
جنات :- شو فيها صحيح إن المسألة صعبه شوي بس النتيجة مذهله تخيل يامجدي عمرك خمسين سنه واللي يشوفك يقول عنك ابن عشرين
مجدي يقول بغضب :- بدي أشيخ مابدي اقعد شاب على طول ازا الموضوع فيه صراصير
جنات :- ياالله اديش معقد يامجدي شو عملوا لك الصراصير شو بينك وبينهن اخذوا عليك شي ضربوك شي الصراصير هدول مسالمين وفي حالهن
مجدي :- انتي اكيد جنيتي شو جرى لعقلاتك وبعدين مافكرتي من وين بدك تجيبي صراصير
جنات :- هاي مش مشكله من اقرب بلاعه واكيد فيه صراصير عم تزورنا من وقت لتاني راح نقبض عليهن ونحطهن في الخلاط ونعملهن كريم
مجدي :- هيك وهن عايشين يامتوحشه يادراكولا أنتي هلق عم تمثلي فيلم رعب لصراصير مش كفايه البيف باف عم يرعبهن بدك أنتي كمان ترعبيهن فكرتك إنسانه حنونه بتخافي على مشاعر الصراصير اقصد الآخرين
جنات :- فكرتك شخص مودرن مش معقد يالطيف اديش معقد وعم تفكر بطريقة رجعيه
مجدي :- جنات ياحبيبتي هدول الصراصير عملوا لي ازمه بحياتي وهلق بدك اعملهن كريم لبشرتي في مره كسرت التلفزيون بسببهن كنت بدي اقتل الصرصور رحت خدت التلفزيون ورميت عليه وفي مره نطيت من الشباك عشان الحق صرصور عشان اقتله اتكسرت رجلي وفي مره حرقت الشقة من شان اقتل صرصور الشقة كلها انحرقت والصرصور ظله عايش وأخر مره اخر حكايه حصلت لي مع الصراصير أني كرهت المزاكره بسببه وسقطت في الليسانس في مره أجاء صرصور لكتابي وأنا طبقت الكتاب وهو داخله منظر الله لايوريك وهلق بدك أتصالح مع الصراصير وأحطهن على بشرتي من شان ما اختير
جنات :- حبيبي أنسى ماضيك وخلي الحقد والغل على جنب الحقد هيدا بيدمر صاحبه اتصالح مع حالك وأنسىس ماضيك وقعدك حاول تتخلص من قعدك
مجدي يقول بغضب :- اسمعي جنات هو يأنا ياالصراصير مش كفايه مستحمل واحده صرصوره متلك اقصد بدك ياني استحملك وانتي حاطة صراصير
جنات تبكي قائلة :- هيك يامجدي مافكرتك هيك
مجدي :- ياقلبي كيف بدك لمانتزوج وبدي هيك ابوسك راح اتخيل نفسي عم ابوس صرصور راح اتخيل رؤس الاستشعار تبعه عم تلمسني لالالا ياجنات شوفي هو يا أنا ياالصراصير وبعدين مين اللي قالك ان كل مابينشر في النت صحيح احيانا فيه اشياء بتكون غير صحيحة اوعك تحطي صراصير بالسر راح اعرف مافي شي بيتخبى
بعد ذلك تذهب جنات الى شقتها وتقابل صديقتها امنيه
امنيه :- والله ياجنات مجدي عنده حق هاي الصراصير حكايه صعبه وبعدين شو عرفك انها حقيقية
جنات :- طيب شو البديل مابدي بشرتي تترهل وتختير
امنيه :- عندك حق ليه ماتحطي زيت الضفادع شفتي اليابانيين اديش بشرتهن حلوه ونضره تشوفي الواحد عمره خمسين سنه وتقولي عمره عشرين سنه
جنات :- وشو عرفك إن القصة هاي حقيقية
امنيه :- أنا قريت في النت وسمعت من مجلة آنستي الصغيرة وقريت في راديو في برنامج رجاءا لاتسدقوا
جنات :- عن جد عم تحكي خايفة تكوني سمعتي غلط
امنيه :- لا ياجنات وصفة حقيقية
جنات :- وليه ماتجربيها
امنيه :- بشرتي كتير حساسة للأشياء الغريبة
جنات :- ومن مين أجيب هاي الزيت
امنيه :-راح اقلك من وين بس اوعك تخبري مجدي
بعديومين تحول لون جنات الى لون اخضر تماما يأتي مجدي الى شقتها وعندماينظر اليها يصرخ قائلا :- مين فرانكشتاين اوشريك
جنات :- ليه عم تقول هيك
مجدي :- لونك صار اخضر شو عملتي بحالك
جنات :- ولاشي
مجدي :- صرتي كتير بشعه ليكون عندك مرض خطير
جنات تبكي قائله :- هيك يامجدي عم تحاول تجرحني
مجدي :- لا ابدا انتي مااطلعتي بالمرايه
جنات :- ايه بس قبل ساعتين ماكان فيني شي
مجدي :- روحي شوفي حالك صايره متل الضفدعه

8-عزومة
ترن جنات على جرس شقة خالد فيفتح لها مجدي الباب
جنات :- هاي ياروحي كيفك
مجدي :- منيح ليه اتاخرتي
جنات :- كنت عم اجيب هدول الاشياء من شان عزومة صاحبك
مجدي :- امتى راح تلحقي تطبخي الوقت تأخر بدي اعرف شو كنت عم تساوي
جنات :- كنت عند الخطاط كتب لي هدول اللوحات
مجدي :- لوحات شو؟
جنات :- اقرأهن
يقرأ مجدي اللوحات والمكتوب فيها لابوسات الابعد الزواج
مجدي :- شو هيدا ؟
جنات :- هدول لوحات راح اعلقهن هون كرمال تتزكر وكرمال صاحبك ما يشك فينا ليه راح يسأل حاله ليه أنا بشقتك هلق مش راح يفكر إنني جيت اطبخ لك لانك وحيد هون وما عندك حدا
مجدي :- هو طبعا لمايشوف اللوحات راح يقول اه هدول علاقتهن شريفة لان اللوحة او اللافته بتدل على هيدا الشي
جنات :- شوفت اديش انا زكيه وبخاف على سمعتي وكمان على سمعتك روح من سكتي عشان أعملهن
مجدي :- اه زكيه كتير بس ياشطوره صاحبي راح يقول لحاله هاي ست مجنونه ويمكن ينصحني اتركك
جنات :- عن جد وانتاراح تسدقه
مجدي – ايه حياتي لأنه بيكون عنده حق
جنات :-بلاهن روح من سكتي من شان اطبخ
مجدي يحدث نفسه قائلا :- طيب الله يستر
جنات :- جبت كل اللي طلبته منك
مجدي :- ايه
جنات :- انا رايحة على المطبخ
تذهب جنات الى المطبخ لإعداد طعام الغداء
جنات :- مجدي فين البيض
مجدي :- عندك
ويشير ناحية البيض
تاخذ جنات البيض
مجدي :- شو راح تعملي
جنات :- كيك
مجدي :- هلق
جنات :- ايه لازم أقدم له كيك لمايجي
مجدي :- ليه من شان تسدي نفسه ماياكل
جنات :- هههههها بلامزح غليظ لازم نقدم له كيك وكعك لمايجي هيك الاتيكيت
مجدي :- اوكيه
تقوم جنات بكسر البيض بقشره في الوعاء
جنات :- فين الدقيق
مجدي يحضر الدقيق
تخظب جنات الكيكة ثم تضع صحن الكيك فوق البوتجاز
مجدي :- هون تحطي الكيك
جنات :- ايه ليه عندك مانع
مجدي :- بس اللي بعرفه إنهن يحطوا الكيك في الفرن
جنات :- انتا شو عرفك هاي طريقة جديده في صنع الكيك
مجدي :- هلق خلصتي الكيك
جنات :- ايه هلق راح اعمل الكعك فين الزبده والسكر
يحضر مجدي الزبده والسكر
تضع جنات ثلاث اكواب من الزبده ثم تضع ثلاثه اكواب من السكر وتخلطهن مع بعض
مجدي :- شو هيدا
جنات :- هيدا كعك السمسم
مجدي :- لكن ماقلتي لي اجيب سمسم
جنات :- نسيت ياقلبي مش مهم
تنتهي جنات من عمل كعك السمسم
ثم تقوم بإعداد كعك المعمول
مجدي :- شوهيدا؟
جنات :- هيدا كعك المعمول ياقلبي راح احط ملعقة صغيره زبده مع عشرين كوب دقيق
مجدي :- اه طيب هيدا كله حلويات ياقلبي
جنات :- هلق بخلص ياحبيبي
بعد الانتهاء تخرج جنات كعك المعمول والذي اصبح قاسيا جدا
مجدي :- شو هيدا ها ي حجاره مش كعك
جنات :- اه مابعرف ليه صار قاسي هيك
مجدي :- بعتقد لو ترميهن لامريكا ماراح يصير لهن شي
بعد ذلك تخرج جنات كعك السمسم من الفرن وهو سائح مع بعضه
مجدي :-شو هيدا فطير مشلتت
جنات :- مجدي مابعرف ليه صار هيك يمكن لأني غلطت بالمقادير
يتنهد مجدي بغضب :- باي مقادير
جنات :- كان لازم احط ثلاث ارباع كوب زبده وثلات ارباع كوب سكر حطيت ثلات اكوا ب زبده وتلات اكواب سكر
مجدي :- ياويلي
جنات :- ما تزعل حبيبي راح اعوضك راح اعمل لك محشي العنب اللي انتابتحبه
مجدي يتنهد ثم يقول :- اوكيه
تضع جنات الرز وهو نيئ في المحشي وتحاول ان تلفه وتغلقه
مجدي :-شو مازبط معك
جنات :- لا ممكن تروح تجيب الدباسة ؟
مجدي :-ليه
جنات :-من شان ادبس ورق العنب
مجدي :- ليه من شان يموت الشاب لساته شاب حرام عليكي اعترفي انك مابتعرفي تطبخي ليه ماحكيتي من الاول
جنات :- سوري حبيبي مابدي ازعلك
مجدي :- كنتي راح تزعليني أحسن لي
جنات :- هلق شو راح تعمل
مجدي :- راح اطلب دليفري عن أزنك
بعد أن يطلب مجدي الطعام من المطعم يتصل بصديقه
الو ------ها ي------جاي بعد ساعة --------بس حبيت تمر هيك على شي خطاط وتخليه يعمل خمس لوحات ويكتب فيهن جنات انتي طالق



9-عقدة الغيره
وكالعاده كانت جنات في شقة مجدي وكانا يشاهدان التلفاز
جنات :- حبيبي خد هاي صوره عن ملف اخي
يأخذ مجدي الملف :- ليه ؟
جنات :- مش انته وعدتني تشوف ليه شي شغله عندكن ؟
مجدي :-بدك اشتغل واسطه هزلت
جنات :- حبيبي انت وعدت ولازم تنفز وعدك
مجدي :- حضرتك احرجتيني هديك اليوم وبعدين كان لازم أوافق من شان أتقرب منك
جنات تقول بحنق :- هيك لكن
مجدي يطلع على الملف :- لاتزعلي راح أشوف
بعد ان يطلع مجدي على الملف :- اووووف اخوكي هادا من مواليد 1985 وأنتي اكبر منه باربع سنوات
جنات :- ايه ياقلبي
مجدي :- بس انتي قلتي انك من مواليد 1990 كيف مازبطت معي
جنات :- ايه كل معلوماتك مزبوطة
مجدي :- لحظه اخوكي من مواليد 85 وطبعا انتي اكبر منه بأربع سنوات وحضرتك من مواليد 1990 بدي تركب معي
جنات :- شو اللي بدك تركب معك ؟
مجدي :- المعجزة هاي
جنات :- وهلق قلي شو راح تعمل ؟
مجدي :- راح أشوف لكن أنتي قولي ؟
جنات :- قولك شو ؟
مجدي :- انتي ياحبيبتي عم تلاحظي انك عم تقضي طول اليوم معي لازم ياروحي تشوفي حالك قاعده بوشي طول اليوم
جنات :- ليه هيدا مدايقك في شي ؟
مجدي :- ايه حاسس حالي مخنوق بدي أتنفس لازم تغيبي شوي من شان اشتاق لك
جنات :- ليه من شان تأخد راحتك مع الصبايا
مجدي :- ياروحي ياقلبي ياعيني مش هيدا هدفي عن جد أنا هدفي تظهري مع رفقاتك تروحي شوبنج تروحي سباحه تعملي رياضة مارسي هواياتك روحي اعملي شي عملية تجميل بدل ماانتي قاعده بوشي طول النهار
جنات :- لكن خلاص زهقت مني
مجدي :-مش القصد ياروحي بس بدي اياكي تتحري من عقدة الغيرة اللي مسيطرة عليكي
جنات :- ايه أنا عم اعمل لك تمارين من شان لما نتزوج تتعود على هيك وانا كما ن اتعود
مجدي :- اه لكن ياحبيبتي راح ازهق منك اقصد لما نتزوج أكون قد مليت منك لازم ياروحي نبتعد عن بعض شوي من شان لمانتزوج نكون مشتاقين لبعض وبعدين أنتي لماتتزوجي راح تكوني مشغوله بطبخك الفاشل وبتربية أطفالنا اللي طبعا راح يطلعوا سطحيين متل أمهن
جنات تقول بغضب :- ايه بان على حقيقتك بدك يخلى لك الجو ياحضرة السفير في بلا د الصبايا
مجدي :- اه ياقلبي كيف بدي اشرح لها هاي جنات بصراحة انا طفشت من قعدتك معي طول اليوم بدي اطهر أروح مع صحباتي مع أصحابي شوفي لازم تخففي زيارتك أليوميه لي
جنا ت تقول بغضب :- شوف يامجدي مش راح أتركك تعمل مابدا لك
مجدي :- روحي اشتغلي لي غفير ولاشو رأيك تصيري البودي جارد تبعي
جنات :- لابقى تتعزر عارفه أفكارك يامجدي
مجدي :-عجيب انتي كتير غبيه وفي بعض الأشياء بتحاولي تكوني زكيه
جنات :- شوف هيدا شرطي والا كل واحد يروح في حاله خد محبسك
مجدي :- احسن هاتي المحبس من شان ابيعه أنا صرفت عليه دم قلبي
جنات تأخذ المحبس من ايدها وتضعها في يد مجدي قائله :- خد محبسك و انا رايحه ومش راح اسامحك لما اعنس
مجدي :- ليه ما الشباب مليانين البلد وأكيد راح تلتقي شاب يصونك ويقدرك
جنات :- بعد ايه بعد ماخليتي أتعقد واكره كل الرجال راح أتخيل كل شاب عم أقابله بشبهك
مجدي :- بالله شو اعملي اللي بدك
جنات :- اوكيه انا رايحه ومش راجعه ورايحه أدور على شباب حلوين اطهر انا وياهن في عمارتنا بس اربعه شبان بياخدوا العقل كل واحد احلى من التاني راغب وعلامه والبقيين نسيت أسمائهن راح اطهر مع كل واحد منهن
مجدي :- عن جد عم تحكي ؟
جنات :- ايه لوتشوف اديش حلوين شي بيرفع الرأس هيك الصبية بتحسس بفخر لما تمشي مع شي شاب حلو راح أروح معهن السباحة وراح اطهر معهن واعمل شوبنج والبوسات مش ممنوعة قبل الزواج مع ألسلامه
مجدي يقول بسرعه :- لالالالالا جنات انتي سدقتي أنا كنت عم امزح معك يالطيف اديش حساسة وبتزعلي من مزحه زغيره اقعدي ياحبيبتي البيت بيتك شو بدك تشربي أنا بحبك وكنت عم اختبر صدق مشاعرك تجاهي لكن انتي اثبتي انك بتحبيني وبامتياز تاعي اقعدي وربي يهدي كي يابنتي ويرجع لك قعلاتك الطايشين







9-امتحان
في شقة جنات دخلت جنات المطبخ وتحدثت إلى والدتها والتي كانت تعد طعام الغداء
جنات :-ماما لساتك بتطبخي
الام :- ايه ماما شو بدك حبيبي
جنات :- بدي ماما أتعلم اطبخ
الام :- ايه حبيبتي لازم تتعلمي تصيري ست بيت ممتازة أجا اخوكي سمير
جنات :- لسه شو بدك تعلميني ؟
إلام :- اللي بدك شوبدك تتعلمي ياعمري
جنات :- كل شي بدي اطبخ واصير شاطره بالطبخ متلك أنا قررت أكون حدك على طول من شان أتعلم مش راح أتركك مهما صار
الأم :- اوكيه ماما
في هذه الاثناء يدق جرس باب الشقة تفتح جنات الباب
امنيه :- هاي جنات
جنات :- هايين امنيه شو هالمفأجأة الحلوه
امنيه :- جنات بدي اياكي تجي معي شفت بلوزه كتير حلوه حجزت لي وليكي قطعتين هدول آخر قطع
جنات :- عن جد حلوين كتير
امنيه :- ايه تاعي نروح نشوفهن ونشتريهن
جنات :- لحظة اغير أوعيي وأجي معك
بعد ذلك تخرج الفتاتان إلى المحل وتشتري البلوزتين وتعودان إلى الشقة
جنات :- تاعي نفرجي ماما اللي اشتريناهن
امنيه :- اوكيه لكن بدي هلق افل اتأخرت كتير عن البيت
جنات :- ايه لااقعدي تغدي عنا اليوم بليز بترجاكي لاتردي طلبي
امنيه :- اوكيه من شانك راح اتصل فيهن بالبيت من شان مايقلقوا علي لكن ماخبرتيني شو إخبارك مع مجود
جنات :-وسط
امنيه :- ليه بتقوللي هيك ؟
جنات :- انا خايفة يكون عم يخونني
امنيه :- بس هو وعدك
جنات :-بس انا لساتني عم اشك فيه لازم اكتشف حسن نواياه
امنيه – وكيف بدك تكتشفي حسن نواياه
جنات :- بفكر اعمل له امتحان
امنيه :- شو هيدا الامتحان ؟
جنات :- اسمعي شو رأيك تساعديني
امنيه :- بشو
جنات – هو لساتو مابيعرفك شو رأيك تروحي لعنده وتختبريه من غير مايعرف انك رفيقتي
امنيه :- كيف بدي اختبره
جنات :- امنيه انتي صبيه كتير حلوه وراح ينصهر أول مايشوفك
امنيه :- وازاماانصهر
جنات :- لالالا مستحيل ماينصهر خاصة مجدي انابعرفه سريع الزوبان
امنيه :-كيف بدك اساوي ؟
جنات :- تروحي لعنده
امنيه :- واقول له انك رفيقتك
جنات :- لاياامنيه لا راح يكتشف الموضوع ويعاملك غير شكل
امنيه :- وافرضي انصهر كيف بدك تساوي راح تتركيه
جنات :- راح افكر وقتها كيف أتصرف معاه
بعد ذلك بيوم ترتدي امنيه بلوزه رائعة مع جينز ازرق ضيق وتضع مكياجا صباحيا رائعا وتدخل مكتب مجدي
امنيه :- ها ي حضرتك الاستاز مجي
كان مجدي منهمكا في مراجعة احدى الملفات وكان لا يرفع رأسه اليها
أمنيه تجلس على إحدى الكراسي القريبه
مجدي يقول دون ان يرفع رأسه :- اهلين انسه اه
امنيه :- انا جيت من شان تشوف لي وظيفه عندكن صارلي متخرجة فتره طويله ولهلق ماتوطفت
مجدي :- بس ياانسه ماعنا وظائف خاليه
امنيه :- بس يااستاز مجدي انا وضعي وظروفي كتير صعبين لا يغرك البلوزه الغاليه اللي اشتريتها ولاجينز اللي لابسته ولاالدهب اللي حاطتته هيدا كله مظاهر
مجدي :- عن جد ياانسه ماعنا وظائف
امنيه :- اسمي اماني جمع امنيه
مجدي :- ايه انسه اغاني مافي عنا وظائف
امنيه تمد يدهاناحية مجدي وتقول بغنج :- اطلع بأيدي منيح
ينظر مجدي ناحية يدها قائلا :- شو بيها أيدك
امنيه :- شو ف مافيهامحبس لساتني عازبه
مجدي :- اه بس احنا ماعنا عرسان أنا خاطب
امنيه :- مش القصد قصدي إني ما عندي زوج يصرف علي
مجدي :- قلبي عندك وأنا شوراح اعمل لك ؟
امنيه :- طيب اطلع بوشي امنيح
مجدي يبحث عن نظارته في كافة إدراج المكتب وأخيرا يجدها في إحدى الدواليب
يركب مجدي نظارته وهو ينظر إليها :- أسف أصلا أنا عندي مشكله بالنظر ولازم البس نظاره
امنيه :-شو شايف
مجدي :- واحده هبلاء واحده ست
امنيه تقول بغضب :- شوف الميك اب
مجدي :- اللي في أيدك
امنيه :- لا اللي بوشي شو رأيك فيه ؟
مجدي :- أسف أصلا ما بقدراشوف امنيح ليه بتخبريني هاي الحكي
امنيه :- من شان تعرف إني صبيه انيقة كتير وبعرف أحط ميك اب حلو كتير طيب ماعم تشم رائحة البرفان الغالي اللي أنا حاطته
مجدي :- لاياانسه للأسف أنا فاقد لحاسة الشم
يخلع مجدي نظارته قائلا :-شوفي الدولاب اللي وراكي شوفي الملف رقم 88 والمكتوب عليه بخط صغير أوراق الموظفين ممكن تجيبي لي إياه لو سمحتي
تقوم امنيه من مكانها وتحاول ان تبحث عنه يشير مجدي بيديه ناحية الملف قائلالها :هنيك ناحية اليمين ايوه صح عم أشم ريحةمش مزبوطه اكيد جايه من الشارع
بعد انتها ء المقابله تذهب امنيه الى جنات لتخبرهابما حدث
وتغني امنيه حبيبي على نياتو كل البنات صحباتو كل البنات اخواتو
بعد خروجها يتصل مجدي بأخو جنات سمير
مجدي :- الو ---------سمير ----ميرسي اليك ياقلبي انك بلغتني ---------اه اجت --------يالطيف شو زنخه بس كنت راح انصهر ----------ميرسي الك وبلغت تحياتي لأختك جنات
في شقة جنات
أمنيه تقول لجنات :- خلاص جنات حطي أيدك بميه باردة خطيبك محترم كنير حتى انه ما رفع نظره وهو بيحاكيني يا ريت كل الشباب متله.
10-فوتوشوب
في شقة مجدي كان جنات ومجدي يتصفحان النت مع بعضهما
مجدي :- اطلعي لهاي شوفي اديش هاي الصورة حلوه .
كانت صوره لطفل رضيع كتير حلو وجدت بواسطة الفوتوشوب
جنات :- الله اديش حلوه هاي بواسطة الفوتوشوب
مجدي :- أكيد
جنات :- شو رأسك مجود
مجدي :- بشو جنونه حبيبي ؟
جنات :- شو رأيك تعملي صوري بالفوتوشوب وأنا اعمل صورك بالفوتوشوب ونشوف مين راح يعمل صور أحسن .
مجدي :- فكره حلوه لامتا الموعد
جنات :- بكره نلتقي متل هيدا الوقت
مجدي :- اوكيه ياعمري .
بعد ذلك تذهب جنات إلى شقتها وتظل تعمل على إخراج صور لمجدي بالفوتوشوب بالمقابل كان مجدي يعمل على إخراج صور لجنات بالفوتوشوب .
تذهب جنات إلى شقة مجدي في الوقت المحدد
مجدي :- شو عملتيهن و إلا تكيسلتي كالعادة ؟
جنات :- لا اكيد تاعى نشوفهن
يجلس الاثنان يتصفحان الصور
جنات :- شوف مجدي هاي صور ه الك شوفها منيح
ظهرت الصوره صوره لجنات حيث ظهر قلبها ومجدي محبوس بداخله وكأنه في سجن
يبتسم مجدي قائلا :- حلوه حبيت هاي راح اعطيكي عليها 8على 10 وهلق اطلعي لهاي الصورة
ظهرت صوره لمجدي وقلبه يسحب جنات إلى داخله بجبال حيث ظهرت جنات بحجم صغير في الصوره
تبتسم جنات قائله :- حلوه حبيت راح أعطيك عليها 7على 10 طيب اطلع لهاي الصورة
تظهر صوره لمجدي تظهر صوره لجنات وهوتحمل مجدي كطفل صغير وتعطيه الرضاعة
يتبسم مجدي :- ههههاي حبيتها عنجد أنا بيبي راح اعطيكي 9على 10شوفي هاي الصوره
تظهر صوره ورده حمراء بداخلها جنات مليئه بالشوك ومجدي يمسكها بيده والدم ينزل من يده
جنات تبتسم قائله :- حلوه بس ماحبيت تقول عني ورده مليانه شوك انا صحيح ورده بس مش شوكه
مجدي يضحك قائلا :- ماأنتي طلعتيني بيبي زغير ليه انا عقلاتي زغار لهيدا الدرجة لاتزعلي شوفي هاي الصوره
تظهر صوره بقره ة برأس جنات والتي كانت تبتسم واحد الاشخاص يحلبها
تغضب جنات قائله :- هيك انابقره
مجدي :- البقره الضاحكة
جنات :- مش حلوه راح اعطيك 2على عشره شوف هاي الصوره
تظهر صوره اسد برأس مجدي يهاجم غزال برأس جنات
مجدي يقول غاضبا:- ياسلام بتشوفيني مفترس وزعلتي لما عملتك بقره راح اعطيكي 1على عشره
جنات :- اسد ملك الغابه ليه زعلت
مجدي :- طيب شوفي هاي
تظهر صور ه لجنات وهي فوق السياره وهي تصدم مجدي وقلبه يذهب بعيدا
جنات تقول غاضبه :-ميرسي الك اناهيك شريره عم تستغل التكنولوجيا راح اعطيك صفر على عشره كان قلبي حاسس انك غدار وراح تغدر ليهك حطيت لك هاي الصوره
تظهر مشنقه وفيهاجنات تظهر مخنوقه والحبل المربوط حول عنق جنات مكتوب باسم مجدي وصورة مجدي فوق رأسها
يبتسم مجدي قائلا :- ياقلبي عامله حالها مظلومه انتوا النسوان تقتلوا القتيل وتمشوا بجنازتواعم تستغلي التكنولوجيا في تحقيق اغراضك شوفي هاي
تظهر صوره لجنات على شكل قرد فوق احد الأشجار يأكل موز
تغضب جنات قائلة :- انا قرده راح اعطيك سالب على عشره والله كان قلبي حاسس شوف هاي الصوره تظهر صوره لمجدي على شكل صرصور يهرب من احد الاشحاص
يقول مجدي بغضب شديد :- مقرفه أنا صرصور وعامله حالك بتحبيني يا منافقه بكرهك هاتي المحبس وروحي
جنات :- وانته طلعتني قرده يامقرود مين قالك أني بحبك كان حب مصلحة
مجدي :- وأنا ما كنت عم احبك كان بدي امشي حالك معك لحتى اخد غرضي منك وبعدين اقلك باي ماتعطلنيش
جنات :- ايه بان على حقيقتك وعامل حاله زعلان لما قلت عنه مفترس مش راح ارجع محبسك راح ابيعه من شان تنقهر
مجدي :- ههههههههاي خديه اصلا انا اشتريت ارخص نوع من شان لما تنفسخ الخطبة ما ازعل عليه
جنات :- هههههههههها أنا عارفه انك مقهور عليه وراح تطق من القهر
مجدي :- بالعكس أنا ماني زعلان على المحبس راح اعطيكي كمان محبسي من شان تبيعيه
الحلقات تتبع
وهبته من روح الهوى صبابة
والبسته ثياب الوفاء المنعم
فأسقاني من نار الجوى كأبة
ووقنت انني من غدره لن اسلم







الزير مجدي قصة مستوحاه من العصر القديم
ارتدى مجدي ملابسه العربيه الاصيلة وعندما انهى ارتداء ملابسه حضرت جنات اليه وهي تقول
جنات :- سيدي الى اين سوف تذهب
مجدي :- سوف اخرج اريد ان اروح عن نفسي قليلا
جنات :- ولكنك ياسيدي تخرج كل ليله وما ان يخنس الليل حتى تبادر الى الخروج
مجدي :- لماذا تسألين اناسيدك ايتها الجاريه ولايحق لكي ان تسألي
جنات :- لقد وعدتني انك لن تتردد على الرايات الحمر مرة اخرى
مجدي :- لقد كان وعد عرقوب
جنات :- ومن يكون عرقوب
مجدي :- لااعلم لقد سمعتها فقط ولااعلم معناها
جنات :- لماذا تفعل بي ذلك لماذا تعذبني لقد احببتك واخلصت لك وانت لايهمك امري بتاتا
مجدي :- هل نسيتي انك مجرد جاريه اشتريتها بحر مالي من سوق النخاسة
جنات :- ولكنك اعتقتني هل نسيت
مجدي :- نعم لقد كان خطأ فادحا لاتجعليني اتراجع عن عتقك
جنات :- ليس غريب عليك هذا التصرف بعد ان امتلأت بالغدر طباعك
مجدي :- ويحك ايتها الجاريه انك تغلظين علي القول سوف اذهب لبيعك في اقرب سوق هل فهمتي
جنات :-لم افهم ايها الزيرمجدي
مجدي :-خسئتي و خسأ شيطانك احترمي نفسك ايتها الساقطه
جنات :- مي بي
مجدي :-ماذا تعني كلمة مي بي
جنات :- يعني يمكن
مجدي :- من اين تعلمتي هذه الكلمة الغريبة
جنات :- لااعلم
مجدي :- ولماذا نطقتيها
جنات :- لأني اشعر انني ساقطةعندما رفضت ان اتركك
مجدي :- لاعليكي فالوقت لم يتأخر بعد اخرجيني من قلبك
جنات :- كيف استطع ان اخرجك من قلبي وانت من سحبني الى قلبك وسجنني فيه
مجدي :- تعبير جميل من اين تعلمتي هذاالتعبير
جنات :-من الفوتوشوب هل نسيت
مجدي :- نعم لقد تذكرت الفوتوشوب الذي كان سببا لخلافنا اليس كذلك
جنات :-يس سير هل يمكنك الان ان تخرجني من قلبك
مجدي :- بالتأكيد اذهبي لإحضار سكين سوف اخرج قلبي حالا وانزعك منه انتزاعا
جنات :- حسن سوف اذهب لاحضار السكين واياك ان تخلف وعدك مثل كل مره
تحضر جنات السكين وتعطيه لمجدي قائلة
خذ سيدي هاك السكين
مجدي :- انتي تذكرييني بفيلم رعب قد رأيته من قبل لااتذكر
جنات :- نعم سيدي في قناة ام بي سي 2 اليس كذلك
مجدي :-اجل
يأخذ مجدي السكين ويحاول ان يخمدها في قلبه لكن جنات تصرخ وهي تقول
لاياسيدي لقد كنت امزح معك لالااااااااااااااااااااااااااااااااااااااا
بعد ذلك تستيقظ جنات مفزوعه من كابوسها
حب جديد
كانت جنات وامنيه تأكلان في احدى المطاعم
امنيه :- جنات طول زعلك مع مجدي لحد امتى راح تضلوكن هيك
جنات :-مابعرف بدي احاكيه بس خايفه
امنيه :-من شو ؟
جنات :- من ردة فعله
فجأة يلمحهما احد الشباب وهو ينظر الى الفتاتين مفتونا
الشاب :- هاي انا محمود شاب مصري عايز اتكلم مع حضرتكن ممكن تسمحوالي اقعد
جنات :- شو هيدا خفف نظراتك شوي راح تاكلنا بهاي النظرات
الشاب :- اسف انساتي انا هيك لما اشوف بنات حلوين مابقدر اشيل عيني من عليهن
جنات :- ليه مافي عندكن بمصر صبايا حلوين
الشاب :- للأسف فيه بس قلال جدا
جنات :- طيب وانت شو بدك هلق
الشاب :- عايزاتعرف وبس
جنات :- هيك بلا احم ولادستور شو هالجرأه هاي
الشاب :- انا كده عيني زايغه ولما اجي لبنان مابعرف شو عم يحصل لي
امنيه :- ياحرام انتا كتير طيوب باين عليك محترم كتير
الشاب :- اه صحيح كتير انا المصري فريد عصري وحيد زماني ومكاني مافيش حد يوقف قدامي
جنات :- عن جد فريد في شو ووحيد في شو ؟
الشاب :- مابتعرفوش الفخر عندنا احنا العرب هيك كان الشعراء في العصر الجاهلي كانوا دائما يفتتحون اشعارهم بالرثاء او الفخر
امنيه :- عن جد قصيدتك هاي حلوه كتير تنفع تكون غنيه حلوه
الشاب :- ماانا شاعر ومغني وهلق عم احوش فلوس عشان اعمل فيديو كليب كتير محترم بالاشتراك مع عشر راقصات من شارع محمد علي ما خبرتوني شو رأيكن ؟
امنيه :- ياالله شو طيوب ومحترم عن جد حبيت
جنات :- بس يااخ محمود انا خاطبه ورفيقتي راح تخطب قريب فلا تعزب حالك
امنيه :- امتى جنات بدك تقطعي نصيبي
جنات :- شتب انتي مابتعرفي مصلحتك اسمع احنا هلق مش فاضيين وعنا شغل كتير فلو سمحت تقوم
الشاب يقوم قائلا :- مالكمش في الطيب نصيب باي
جنات :- باي والقلب داعي لك .

مازلت احاول ان الملم افكاري المشتته وان اصبها في قالب واحد ولكني لم استطع لقد شل فكري قبل يدي وتوغل اليأس في جسدي كله لمحت بطرف عيني والدتي المقبله علي وقد كست وجهها علامات الحزن والضيق على ماصارله امري
ترفق بنفسك ياولدي ماالذي يشغل جل تفكيرك هل مازلت تحن اليها
نعم يااماه وهل يوجد غيرها من الحب ماقتل
دعك منها وانتبه لمستقبلك انظر الى حالك لقد الفت على احزانك على الامك اخرج نفسك من هذا الحبس الى متى ستظل اصفاد عشقها تقيدك
اتركيني وشأني فأكرم العشق من صان الهوى
نعم واكذب العشق من مال للجوى
يولد الحب من دعج المقل ومن سهم لحظ بقلب نزل
نعم ولكن هناك الكثير غيرها فبئس حب بجسم قد نحل
اخبرتك ان تتركيني دعيني وشأني سوف اطالب بها
سيبتونك ويبتون اهلك وقومك عن بكرة ابيهم
هيهات ان يصيبوني بسوء فأنا باسل كبسالة الاسد في عرينه
تبتل الى ربك وارجع عما انت فيه وتذكر ان كل شئ زائل وما تطلبه ايضا فان وكن نعم الرجل الاواب فما انبل وما اكرما
هوني عليك ياأماه وتريثي هل مازال الخوف يأصر قلبك الضعيف ويوصد ابواب الامل في وجهك ووجهي الى متى سنظل نرهب ونهاب مالايستحق منا المهابه
عشقك الابدي ياولدي الحريه أية حرية تريدها واي حب لها جعلك تشرد من بين ايدينا وتتوه بأفكارك وتنحاز الى ركن بعيد الى اين ستقصي نفسك وتقصينا
اذا سأظل افكربها وأحلم بها ولن تغيب عن بالي لحظة واحده فلا تحاسبوني على ماافكر به وعلى مايتيه به عقلي
لك ماشئت سوف ادعك على هذا الحال الى ان يأتي احد ويوقظك من اوهام احلامك المبعثره
مع تحياتي الكاتبه لبنى محمد اليمن



الرجوع الى أعلى الصفحة اذهب الى الأسفل
ღ Marimar ღ
Admin


رسالة sms الى نيشان المحترم و الى أروع اعلامي بالساحة العربية، لك كل التقدير و الاعجاب و نتمنى لك النجاح و التوفيق في برنامجك الجديد أبشر.. أبشر يا نيشان لأن برنامجك سيكون أكيد أكيد رائع و نجمك سيسطع أكثر على شاشة ام بي سي.
انثى
عدد الرسائل : 2376
العمل/الترفيه : طالبة
نقاط : 1461
السٌّمعَة : 9
تاريخ التسجيل : 01/09/2007

مُساهمةموضوع: رد: مغامرااااااااات جنات    الخميس سبتمبر 30, 2010 3:44 pm

يرسي كتير ع الرواية لبنى انا قريت بس المقطع الاول و باينتها رواية رووعة و لي رجعة ع الموضوع و يا هلا فيكي معنا بالمنتدى

_________________



الرجوع الى أعلى الصفحة اذهب الى الأسفل
http://neshan-fans.yoo7.com
 
مغامرااااااااات جنات
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مملــكة الاعلامــي نيشــان :: ღ أقســاٌم الملك نيشـان للفكر و الادب ღ :: منتدى القصص القصيرة-
انتقل الى: